நாகை மாவட்டம், கோடியக்கரை அருகே கடலில் மீன்பிடித்துக் கொண்டிருந்தபோது, இலங்கை கடற்கொள்ளையர்கள் தாக்கியதில் வேதாரண்யம் பகுதி மீனவர்கள் 28 பேர் காயமடைந்தனர்.இவர்களில் பலத்த காயமடைந்த 8 பேர் வேதாரண்யம் அரசு மருத்துவமனைகளில் அனுமதிக்கப்பட்டுள்ளனர்.
வேதாரண்யம், ஆறுகாட்டுத்துறை மீனவர் காலனியைச் சேர்ந்த ஜெ. பாஸ்கர் (53) என்பவருக்கு சொந்தமான விசைப்படகில், அவருடன் மீனவர்கள் கோ. அருள்ராஜ் (40), ரெ. செல்வமணி (48), ஆ. தினேஷ் (18) ஆகியோர் திங்கள்கிழமை கடலுக்கு சென்றனர். இவர்கள் நால்வரும், அன்று மாலை சுமார் 6 மணியளவில் ஆறுகாட்டுத்துறையில் இருந்து தென்கிழக்கே 22 கடல் மைல் தொலைவில் மீன்பிடித்துக் கொண்டிருந்தனர். அப்போது, இலங்கையைச் சேர்ந்த 3 படகுகளில் அங்கு வந்த கடற்கொள்ளையர்கள் 9 பேர், மீனவர்களை கத்தி மற்றும் இரும்புக் கம்பியால் தாக்கி, மீன்பிடி வலை, கைப்பேசி, ஜிபிஎஸ் கருவி, கை விளக்கு ஆகியவற்றை பறித்துச் சென்றுள்ளனர்.
கடற்கொள்ளையர்கள் தாக்கியதில் பாஸ்கருக்கு தலையிலும், அருள்ராஜுக்கு இடது கையிலும் காயம் ஏற்பட்டது. இதேபோல், ஆறுகாட்டுத்துறையிலிருந்து மேலும் இரு விசைப்படகுகள், 2 கண்ணாடியிழைப் படகுகளில் வெள்ளப்பள்ளம், புஷ்பவனம் ஆகிய மீனவ கிராமங்களில் இருந்து சென்ற மீனவர்கள் 24 பேர் அடுத்தடுத்து கடற்கொள்ளையர்களால் தாக்கப்பட்டனர். அவர்களிடம் இருந்த உடைமைகளும் பறிக்கப்பட்டன. கடலில் 7 இடங்களில் திங்கள்கிழமை மாலை 6 முதல் இரவு 11 மணிக்குள் இந்த சம்பவங்கள் நடந்துள்ளன.
பாதிக்கப்பட்ட 28 மீனவர்களும் செவ்வாய்க்கிழமை வெவ்வேறு நேரங்களில் படகுகளுடன் கரைக்குத் திரும்பினர். இவர்களில் பலத்த காயமடைந்த மீனவர்கள் பாஸ்கர், அருள்ராஜ், அருள்வேல், சுப்பிரமணியன், வெற்றிவேல், செந்திலரசன், மருது, வினோத் ஆகிய 8 பேரும் வேதாரண்யம் அரசு மருத்துவமனையில் அனுமதிக்கப்பட்டுள்ளனர். பின்னர், இவர்களில் 3 பேர் நாகை அரசு மருத்துவமனைக்கு அனுப்பிவைக்கப்பட்டனர். இந்த சம்பவம் தொடர்பாக வேதாரண்யம் கடலோரக் காவல் நிலைய போலீஸார் விசாரணை மேற்கொண்டுள்ளனர். மேலும், கியூ பிரிவு, தனிப் பிரிவு போலீஸாரும் விசாரித்து வருகின்றனர்.
