ரியல் சிங்கம்பட்டி ஜமீன் வரலாறு தெரியுமா..? அவரை பற்றிய சிறு தொகுப்பு உங்களுக்காக!

சிங்கம்பட்டி ஜமீன் பற்றிய உண்மை வரலாற்றை எழுத்தாளர் துரை. மோகன்ராஜ் கட்டுரையாக எழுதியுள்ளார். அவற்றை பார்க்கலாம்.

இன்று ஆடி அமாவாசை காரையாறு சொரிமுத்து அய்யனார் கோவில் திருவிழா சிங்கப்பட்டி குர்நில மன்னர் நல்ல புத்தி சிவசுப்பிரமணிய முருகதாஸ் தீர்த்தபதி அவர்கள் அரச உடை அணிந்து திருவிழாவில் பவனி வருவார். அவர் இயற்கை எய்தி விட்டார். இது அவரைப் பற்றிய பழைய பதிவு.

தமிழ்நாட்டின் கடைசி ராஜா சிங்கம்பட்டி ஜமீன் தென்னாட்டுப் புலி டி. என். எஸ். முருகதாஸ் தீர்த்தபதி ராஜா …. தென் இந்தியாவில் எஞ்சியிருக்கும் பட்டம் கட்டிய ஒரே ராஜாவாகக் கருதப்படுபவர்தான் சிங்கப்பட்டி முருகதாஸ் தீர்த்தபதி அவர்கள்.

இவரது முழுப்பெயர்… தென்னாட்டுப் புலி நல்லகுத்தி சிவசுப்பிரமணிய கோமதி சங்கர ஜெய தியாக முத்து சண்முக சுந்தர முருகதாஸ் தீர்த்தபதி. சுருக்கமாக டி. என்.எஸ்.முருகதாஸ் தீர்த்தபதி. இவரது தந்தை சங்கர தீர்த்தபதி.

ஆங்கிலத்தில் மிகச்சிறந்த புலமை பெற்றுள்ள இவர் சிறந்த டென்னிஸ் விளையாட்டு வீரர். பாலே நடனத்தில் புகழ் பெற்றவர். ரக்பி விளையாட்டிலும் முத்திரை பதித்தவர்.

தந்தை இறந்ததை அடுத்து மூன்றரை வயதில் இவருக்கு முடிசூட்டப்பட்டுள்ளது. அக்கால சம்பிரதாயப்படி முடி சூட்டப்படுபவர் இறந்தவர் உடலைப் பார்க்கக்கூடாதாம். அதனால் தந்தையாரின் உடலை இவருக்குக் காட்டவில்லையாம்.

முடி சூட்டப்படுபவர்களுக்கு ஆய கலைகள் அறுபத்து நான்கும் கற்பிக்கப்படுவது உண்டு. ஆனால் இவருக்கு அப்படி எந்தப் பயிற்சியும் அளிக்கப்படவில்லையாம். இருந்தாலும் இவரோ
குறி பார்த்துச் சுடுதல், ரக்பி,பாலே நடனம், உதைப் பந்தாட்டம்,சிலம்பு, வாள் வீச்சு என்று பல துறைகளிலும் சிறந்து விளங்கியுள்ளார்.

நேபாள ராஜாக்கள் கோயிலுக்கு செல்வதில்லையாம். காரணம் அவர்கள் தங்களை விஷ்ணுவின் அவதாரமாக கருதுகிறார்களாம். மழையில்லாத ஊருக்கு அரசர்கள் சென்றால் மழை பெய்யும் என்பது சாஸ்திரம் மட்டுமல்ல மக்களின் நம்பிக்கையும் கூட. அதே போல 1984 ஆம் ஆண்டு மழையே காணாத மாஞ்சோலை ஊருக்கு இவரை அழைத்தார்களாம். இவர் அங்கு போனது தான் தாமதம் மழை கொட்டோ கொட்டு என்று கொட்டித் தீர்த்துள்ளது.

அதற்காக அந்த மலை கிராம மக்கள் அவருக்கு நன்றிக்கடனாக
துலாபார மரியாதை செய்துள்ளனர். 1952-ம் ஆண்டு ஜமீன் ஒழிப்புச் சட்டம் வரும் வரை மேற்குத் தொடர்ச்சி மலையில் 74,000 ஏக்கர் நிலங்கள் ஜமீன் ஆளுகையில் இருந்து வந்தது. மேலும், சிங்கம்பட்டி ஜமீன் ஆளுகையில் காரையார் சொரிமுத்து அய்யனார் கோயில், அகமகாதேவர் கோயில், முத்தாரம்மன் கோயில்,
வல்லப கணபதி கோயில், வெயில் உகந்த அம்மன் கோயில், முப்புடாதி அம்மன் கோயில், சுப்பிரமணியசாமி கோயில், ஊத்துக்குளி சாஸ்தா ஆகிய
8 கோயில்கள் உள்ளன.

இக்கோயில்களுக்கு முருகதாஸ் தீர்த்தபதி பரம்பரை அறங்காவலராக இருந்து வருகின்றார். காரையார் சொரிமுத்து அய்யனார் கோயிலில் ஆண்டுதோறும் நடைபெறும் ஆடி அமாவாசை திருவிழாவில் ஜமீன்தார் முருகதாஸ் தீர்த்தபதி பக்தர்களுக்கு ராஜ உடையில் காட்சியளிப்பார்.

தொடர்ந்து 74 ஆண்டுகளாக சொரிமுத்து அய்யனார் கோயிலில் இவர் ராஜ உடையில் காட்சி அளித்துள்ளார். சிங்கம்பட்டி ஜமீன், பிரிட்டிஷ் அரசுக்கு ஆண்டுக்கு ரூ. 8 ஆயிரம் கிஸ்தி செலுத்தி வந்துள்ளனர். இன்று சிங்கம்பட்டி ஜமீன் திருநெல்வேலி மாவட்டத்தில் உள்ள ஒரு கிரமமாகத்தான் அறியப்படுகின்றது.

ஆனால் 20ஆம் நூற்றாண்டின் தொடக்கத்தில், அது 320 சதுர கிலோ மீட்டர் பரப்பளவு கொண்ட, பல கிராமங்களை உள்ளடக்கிய ஒரு ஜமீன். தனி நபரால் வரி வசூல் செய்யப்பட்டு, ஆட்சி செய்யப்பட்டு, ஆங்கிலேய அரசின் கட்டுப்பாட்டில் இருந்த பிரதேசம். சிங்கம்பட்டி ஜமீன் அதிக வனப்பகுதியைக்  கொண்ட பகுதி. இந்த சிங்கம்பட்டி ஜமீனுக்கு 900 ஆண்டு வரலாறு சொல்லப்படுகின்றது.

சிங்கம்பட்டி ஜமீனுக்குச் சொந்தக்காரர்கள் பாண்டியர்களின் வழித் தோன்றல்கள் என்றும் நாயக்க மன்னர்கள் காலத்தில் சிங்கம்பட்டி பாளையமாக மாறியது என்றும், பின்னர் ஆங்கிலேயர் ஆட்சி காலத்தில் அது ஜமீனாக மாறியது என்றும் சொல்லப்படுகிறது. 18 ஆம் நூற்றாண்டின் தொடக்கத்தில் திருவாங்கூர் சமஸ்தானத்தைத் தோற்றுவித்த ராஜா மார்த்தாண்ட வர்மாவுக்கும்,
எட்டு வீட்டுப் பிள்ளைமார்களுக்கும் ஆட்சி அதிகாரத்தைப் பிடிக்க நடந்த போரில்,
சிங்கம்பட்டி ஜமீனைச் சேர்ந்தவர்கள் ராஜா பக்கம் நின்று போர் செய்து வெற்றி பெறச் செய்தனர்.

அதற்கு நன்றிக் கடனாக, ராஜா மார்த்தாண்ட வர்மன் தன்னுடைய ராஜ்ஜியத்திலிருந்து 74,000 ஏக்கர் வனப்பகுதியை சிங்கம்பட்டி ஜமீனுக்குக் கொடையாக அளித்தார்.

ஜமீன் சிங்கம்பட்டியில் சிங்கம்பட்டி அரண்மனை 5 ஏக்கரில் அமையப் பெற்றுள்ளது. சிங்கம்பட்டி ஜமீனில் 1,000 குதிரைகளை வைத்துப் பராமரித்து வந்துள்ளனர். 5 தந்தப் பல்லக்குகள் இருந்தன.

ஜமீன்சிங்கம்பட்டி அரண்மனையில் கிங் ஜார்ஜ் தொடக்கப் பள்ளி இப்போதும் செயல்பட்டு வருகின்றது. அரசு உதவி பெறும் பள்ளி. தற்போது விவசாயம் செய்து வரும் ஜமீன்தார் முருகதாஸ் தீர்த்தபதி ஆயுள் காப்பீட்டு முகவராகவும் உள்ளார்.