“தமிழ்நாடு வாழ்க” முதலமைச்சர் ஸ்டாலின் ட்வீட்..! தமிழ்நாடு நாள் உருவான கதை..!

“தமிழ்நாடு வாழ்க” முதலமைச்சர் ஸ்டாலின் ட்வீட்..! தமிழ்நாடு நாள் உருவான கதை..!

இன்று தமிழ்நாடு நாள் கொண்டாடப்பட்டு வருகிறது., அதனையொட்டி தமிழ்நாடு எனப் பெயர்  சூட்டிய முன்னாள் முதல்வர் அண்ணா சட்டப்பேரவையில் பேசிய வீடியோ காட்சிகளை  முதலமைச்சர் ஸ்டாலின்  தனது  எக்ஸ்  வலைத்தளம் பக்கத்தில் பகிர்ந்துள்ளார்.

அதனை தொடர்ந்து முதலமைச்சர் ஸ்டாலின் பேசுகையில், “கடல் கண்டு, மலை கண்டு பயன்கொண்ட தமிழ்நாடு வாழ்க. களங்கண்டு, கலை கண்டு, கவி கொண்ட தமிழ்நாடு வாழ்க. உடல் கொண்டு, உரங்கொண்டு, உயிர் கொண்ட தமிழ்நாடு வாழ்க.

ஜூலை 18, தமிழ்நாடு திருநாள் என்று சொல்லும்போதே நம் உள்ளத்தில் மகிழ்ச்சி ஏற்படுகிறது.  ஒரு ஆற்றல் பிறக்கிறது. தமிழ்நாடு வாழ்க. தமிழ்நாடு வாழ்க. தமிழ்நாடு வாழ்க” என முடிக்கிறார்.

தமிழ்நாடு வாழ்க!
தமிழ்நாடு வாழ்க!
தமிழ்நாடு வாழ்க!#வாழ்க_தமிழ்நாடு! pic.twitter.com/fLZt5L3HhL

— M.K.Stalin (@mkstalin) July 18, 2024

தமிழ்நாடு நாள் உருவான கதை :

தமிழ்நாட்டிற்கு முதன் முதலில் “மெட்ராஸ் ஸ்டேட்” என்ற பெயர் தான் இருந்தது. அதன் பின் அந்த பெயரை நீக்கிவிட்டு “தமிழ்நாடு” என்று பெயர் வைக்க வேண்டும் என்று தொடர் உண்ணாவிரதம் இருந்த காங்கிரஸ் கட்சியை சேர்ந்த சங்கரலிங்கனார் 1956-ம் ஆண்டு அக்டோபர் 13-ம் தேதி உயிர்நீத்தார்.

தமிழ்நாடு என்று பெயர் சூட்டவேண்டும் என்று திமுக சட்டமன்ற உறுப்பினர்கள் 1957-ல் கொண்டு வந்த தீர்மானம் வாக்கெடுப்பு படும் தோல்வியடைந்து. அதன் பின் 1961-ம் ஆண்டு சோஷலிஸ்ட் கட்சி சட்டமன்ற உறுப்பினர் சின்னதுரை கொண்டு வந்த தீர்மானமும், கம்யூனிஸ்ட் கட்சியைச் சேர்ந்த பூபேஷ் குப்தாவின் தனிநபர் மசோதாவும், 1963-ம் ஆண்டு கொண்டுவரப்பட்ட  மற்றொரு  தீர்மானமும்  தோல்வி அடைந்தது.

1967-ம் ஆண்டு அண்ணா ஆட்சி பொறுப்பேற்ற பின் சென்னை செயின்ட் ஜார்ஜ் கோட்டை “தமிழ்நாடு  அரசு  தலைமைச் செயலகம்”  என  பெயர் மாற்றம் செய்யப்பட்டது. 1968-ம் ஆண்டு ஜூலை 18-ம் நாள் நம் மாநிலத்திற்கு “தமிழ்நாடு” என்று பெயர் மாற்றம் செய்வதற்கான  தீர்மானங்கள்  கொண்டுவரப்பட்டது.

1968ம்  ஆண்டு நவம்பர் மாதம் 23-ம் நாள் “தமிழ்நாடு” என்ற பெயர் மாற்றம் நாடாளுமன்ற மசோதாவில் நிறைவேற்றப்பட்டது.  1969-ம் ஆண்டு ஜனவரி 14-ம் தேதி சென்னை மாகாணம் “தமிழ்நாடு” என்று பெயர் மாற்றம் செய்யப்பட்டது.

ஜூலை 18-ம் தேதி நிறைவேற்றப்பட்ட தீர்மானம் நாளைக் கொண்டாட வேண்டும் என்பதற்காக 2021-ம் ஆண்டு முதலமைச்சர் மு.க.ஸ்டாலின் அறிவுறுத்தலின் படி “தமிழ்நாடு” பெயர் மாற்றம் நாள் கொண்டாடப்பட்டு வருகிறது.

– லோகேஸ்வரி.வெ