நள்ளிரவில் திருட்டில் ஈடுப்பட்ட சூட்கேஸ் திருடன்.. போலீஸ் விசாரணை..!
கோவை அபிராமி நகர் பகுதியைச் சேர்ந்தவர் ராமசாமி. இவர் தனது குடும்பத்துடன் வசித்து வந்த நிலையில், நேற்று நள்ளிரவு வீட்டில் தூங்கி கொண்டிருந்தபோது நள்ளிரவி 2.15 மணியளவில் ராமசாமியின் வீட்டிற்கு வெளியே சத்தம் கேட்டுள்ளது.
இந்த சத்தம் சுமார் அரை மணி நேரத்திற்கும் மேலாக கேட்டுக் கொண்டே இருந்ததால், இந்த சத்தம் எங்கிருந்து கேட்கிறது என்பதை பார்ப்பதற்காக ராமசாமி அவரின் வீட்டின் கதவை திறக்க முயன்றார்.
கதவை திறக்க எவ்வளவு முயன்றும் ராமசாமியால் கதவை திறக்க முடியவில்லை. இதனால் அவர் வீட்டில் உள்ள மின் விளக்குகளை போட்டுள்ளார். அப்போது மர்ம நபர் ஒருவர் வீட்டின் உள்ளே இருந்து காம்பவுண்ட் சுவர் ஏரி தப்பி ஓடினார். இதனை பார்த்து அதிர்ச்சியடைந்த ராமசாமி, வீட்டில் இருந்த மற்றவர்களை சத்தம் போட்டு எழுப்பியுள்ளார்.
அவரின் சத்தம் கேட்டு எழுந்த ராமசாமியின் குடும்பத்தினர் அனைவரும் இணைந்து கதவை திறந்து பார்த்தனர். அப்போது கதவின் முன்பு உளி, ஸ்க்ரூ டிரைவர், பல் துளக்கும் பிரஸ் போன்றவை கிடந்தன. , அந்த நபர் கதவை திறப்பதற்கு முயற்சி செய்தது தெரியவந்தது.
இதனை பார்த்த ராமசாமியின் குடும்பத்தினர் சிசிடிவி காட்சிகளை பார்க்க முடிவு செய்தனர். ஆனால், சிசிடிவி கேமராவும் உடைக்கப்பட்ட நிலையில் இருந்ததால் உடனடியாக சரவணம்பட்டி காவல்நிலையத்தில் தகவல் அளித்தனர்.
தகவலின் படி சம்பவ இடத்திற்கு விரைந்து வந்த போலீசார், அப்பகுதியில் இருந்த மற்ற சிசிடிவி கேமராக்களை ஆய்வு செய்தனர்
அதில், முகமூடி அணிந்த மர்ம நபர் ஒருவர் சூட்கேஸ் உடன் வீட்டின் காம்பவுண்ட் சுவரை தாவி குதித்து உள்ளே வந்தது தெரிய வந்தது.
பின்னர் கைரேகை நிபுணர்கள் உதவியுடன் தடயங்களை சேகரித்த போலீசார் தீவிர விசாரணை நடத்தி வருகின்றனர்.
-பவானி கார்த்திக்
