ஓடும் பஸ்சில் பீர் குடித்து கும்மாளமிட்ட மாணவிகள் தொடர்பாக கல்வித்துறை மற்றும் திருக்கழுக்குன்றம் போலீசார் விசாரணை நடத்தி வருக்கின்றனர்.
செங்கல்பட்டு மாவட்டம், திருக்கழுக்குன்றம் ஒன்றியத்துக்குட்பட்ட அரசு பள்ளியில் 12ம் வகுப்பு படிக்கும் மாணவிகள் அரசு பஸ்சில் அரசு பள்ளி சீருடையுடன் ஒரு பீரை 3 மாணவிகள் மாறி, மாறி குடிப்பது போன்ற ஒரு வீடியோ சமூக வளைதளங்களில் வைரலானது.
34 வினாடிகள் உள்ள இந்த வீடியோ காட்சியில் பீர் குடிக்கும் மாணவிகளின் முகம் தெளிவாக தெரிகிறது. மேலும் ‘குடிச்சா வாசனை வருமாடி’ என மாணவிகள் கேட்டபடி ஒவ்வொருவராக குடிக்கின்றனர். இந்த காட்சியை மாணவி ஒருவரே வீடியோவாக பதிவு செய்துள்ளார். பின்னர் இது சமூக வலைதளங்களில் பரவி உள்ளது.
இது தொடர்பாக கல்வித்துறை மற்றும் திருக்கழுக்குன்றம் போலீசார் விசாரணை நடத்தி வருகிறார்கள். பீர் குடித்து பஸ்சில் ரகளையில் ஈடுபட்ட மாணவிகளை தனித்தனியாக அழைத்து அறிவுரை கூறி எச்சரிக்க திட்டமிட்டு உள்ளனர். சம்பந்தப்பட்ட பள்ளியிலும் ஆசிரியர்கள் தனியாக விசாரித்து வருகிறார்கள். இச்சம்பவம் பொதுமக்கள் மத்தியில் அதிர்ச்சியை ஏற்படுத்தி உள்ளது.
இதுபோன்ற அசம்பாவிதங்கள் நடைபெறாமலிருக்க அந்தந்த ஊர்களில் உள்ள அரசு மற்றும் தனியார் பள்ளிகளில் மாணவ, மாணவிகளை சேர்த்தால் ஊருக்கு பயந்தும், சக உறவினர்களுக்கு பயந்தும் மாணவ, மாணவியர் ஒழுங்காக படிப்பார்கள் என்றும், அரசின் இலவச பஸ் பாஸ் தான் இருக்கே என்ற ஒரு காரணத்தால் ஊரு விட்டு ஊரு வந்து படிப்பதால் தம்மை யாரும் கண்டுக்கொள்ளமாட்டார்கள் என்ற தைரியத்தில் இவர்கள் இதுபோன்ற ஒழுங்கீன செயல்களில் ஈடுபடுகின்றனர் என்றும், பள்ளி கல்வி துறையில் சில கடுமையான மாற்றங்கள் கொண்டுவர வேண்டும் என்றும் சமூக ஆர்வலர்கள் கருத்து தெரிவித்துள்ளனர்.
