அதிமுக முன்னாள் அமைச்சர் மணிகண்டனுக்கு எதிரான நடிகை தொடர்ந்த வழக்கில் சென்னை உயர்நீதிமன்றம் அதிரடி உத்தரவை பிறப்பித்துள்ளது.
கடந்த வருடம் ஜுன் மாதம், நடிகை சாந்தினி முக்கிய அதிமுக மாஜி அமைச்சர் மணிகண்டன் மீது பாலியல் குற்றச்சாட்டு ஒன்றை தெரிவித்தார்.
இது குறித்து அடையாறு மகளிர் காவல் நிலையத்தில் புகார் அளித்திருந்தார். அதில், அதிமுக மாஜி அமைச்சர் மணிகண்டன் தன்னை
கல்யாணம் செய்து கொள்வதாக கூறி ஏமாற்றிவிட்டதாகவும், அவரை நம்பி 3 முறை கருக்கலைப்பு செய்ததாகவும், இந்த விஷயம் மணிகண்டன் சம்பந்தப்பட்டவர்களுக்கு தெரியும் என்றும் அந்த புகாரில் தெரிவித்திருந்தார். அத்துடன் சில ஆதாரங்களையும் அப்போது அளித்திருந்தார்.
இந்த புகாரின் பேரில் அதிமுக மாஜி அமைச்சர் மணிகண்டன் மீது 5 பிரிவுகளின் கீழ் வழக்குப்பதிவு செய்யப்பட்டது. அதன் அடிப்படையில் அவர் கைது செய்யப்பட்டார். இதையடுத்து சென்னை உயர்நீதிமன்றத்தில் ஜாமீன் கோரி மனு தாக்கல் செய்த நிலையில், அவருக்கு நிபந்தனை ஜாமீன் வழங்கப்பட்டது.
இந்நிலையில், நடிகை தரப்பில் சென்னை உயர்நீதிமன்றத்தில் மனு தாக்கல் செய்துள்ளார். அதில் முன்னாள் அமைச்சர் மணிகண்டன் மீது தான் அளித்த புகார் தொடர்பான வழக்கு சைதாபேட்டை நீதிமன்றத்தில் நிலுவையில் உள்ளதால் அந்த வழக்கை சென்னை கலெக்டர் அலுவலக வளாகத்தில் உள்ள எம்பி, எம்எல்ஏக்கள் மீதான வழக்குகளை விசாரிக்கும் சிறப்பு நீதிமன்றத்திற்கு மாற்றி உத்தரவிட வேண்டும். அதேபோல் வழக்கை விரைந்து விசாரிக்க வேண்டுமென கோரிக்கை வைத்துள்ளார்.
இந்த வழக்கு நீதிபதி ஏ.டி. ஜெகதீஷ் சந்திரா முன்பு விசாரணைக்கு வந்தபோது, வழக்கில் குற்றப்பத்திரிகை தாக்கல் செய்யப்பட்டாலும், வழக்கு எண்ணிடும் பணி இன்னும் முடியவில்லை என்று போலீஸ் தரப்பில் தெரிவிக்கப்பட்டது.
இதனை ஏற்றுக்கொண்ட நீதிபதி, குற்றப்பத்திரிகை நடைமுறை முடிந்தவுடன், வழக்கு தானாகவே சிறப்பு நீதிமன்றத்திற்கு மாற்றப்படும் என்றார்.அத்துடன் நடிகை தொடர்ந்த வழக்கையும் முடித்துவைத்து உத்தரவிட்டார்.
Discussion about this post