ஆசியாவின் மிகப்பெரிய தனியார் நூலகம்..!
சென்னையிலோ, டில்லியிலோ, கொல்கத்தாவிலோ, டோக்யோவிலோ, சிங்கப்பூரிலோ இல்லை.
விருத்தாசலத்ததில்தான் இருக்கிறது…
கிடைத்தற்கரிய பழைய நூல்களைத் தேடி அலையும் தமிழ் ஆர்வளர்களுக்கு சரணாலையமாக விருத்தாசலத்தில் அமைந்து இருக்கும்
இந்த தமிழ் நூல் காப்பகமே..
ஆசியாவின் மிகப்பெரிய தனியார் நூலகம் ஆகும்.
தம் வாழ்நாள் பணியாக இந்த நூலகத்தை நிறுவியுள்ளார்
புலவர்
பல்லடம் மாணிக்கம்.
அண்ணாமலைப் பல்கலைக்கழகத்தில் படித்த காலத்திலிருந்தே நூல்களைச் சேமித்து வைத்து இன்று ஒரு லட்சத்திற்கும் மேலான நூல்களைச் சேர்த்து வைத்துள்ளார்.
இந்த நூலகத்தில் மிகப்பழமையான பல நூல்கள் உள்ளன.
இருநூற்று ஐம்பது ஆண்டுகளுக்கு முன்பு அச்சிடப்பெற்ற பெப்ரீசியசு அகராதி, சங்க இலக்கியம் தொடங்கி சிற்றிலக்கியங்கள் வரைப் பல் தொகை நூல்களின் முதல் பதிப்புகள், தொல்காப்பியம் முதல் பதிப்பு, கம்பராமாயணத்தின் பத்துக்கு மேற்பட்ட பதிப்புகள் எனப் பல முதல் பதிப்பு நூல்கள் அமைந்திருப்பது தமிழ் நூல் காப்பகத்தின் தனிச்சிறப்பு.
திருக்குறளின் அத்தனைப் பதிப்புகளோடு திருக்குறள் சம்மந்தப்பட்ட 1500 க்கும் மேற்பட்ட நூல்கள் அனைத்தும் இங்கு இருக்கிறது.
பாரதி, இளங்கோ, கம்பன், பாரதிதாசன் ஆகியோரின் படைப்புகளும் அவை பற்றிய அனைத்து ஆய்வு நூல்களின் தொகுப்புகளும் இங்கு உள்ளன.
நான்கு உபநிடதங்கள், வேதங்கள், தமிழ்க், ஆங்கில கலைக்களஞ்சியங்கள், பல்கலைக் கழகங்களின் வெளியீடுகள், சித்தாந்த சாத்திரம், சமைய நூல்கள், நாலாயிரத் திவ்யப் பிரபந்தம், பன்னிரு திருமுறை எனப் பல பரிமாணங்களில் நூல்களை வகைப்படுத்தி வைக்கப்பட்டுள்ளன.
மறைமலை அடிகள், தெ.பொ.மீ., வையாபுரி, மு.வ.,பாவாணர், ந.சி.கந்தையா, முதலிய ஆய்வு முதல்வர்களின் நுட்பமான ஆய்வு நூல்கள், காந்தியடிகள், காரல்மார்க்சு , அம்பேத்கர், பெரியார், அண்ணா முதலிய சமுதாய சிந்தனையாளர்களின் அரிய நூல்தொகுதிகளும் இடம்பெற்றுள்ளன.
ஐநூற்றுக்கும் மேற்பட்ட ஆய்வேடுகள் உலகின் தலை சிறந்த திரைப்படங்களின் குறுந்தகடுகள் இசைக் குறுந்தகடுகள் எனப் பல அரிய குறுந்தகடுகளும் அமைந்திருப்பது இந்த நூலகத்தின் கூடுதல் சிறப்பாகும்.
தரைத் பகுதி தளத்தில் நூலகமும் மேல் பகுதி தளத்தில் கூட்டம் நடத்துவதற்கான அரங்கும் ஆய்வாளர்கள் தங்கி ஆய்வு செய்வதற்கான அறைகளும் அமைந்த கலை நயம் மிக்க கட்டடமாகத் திகழ்கிறது இது…
அண்ணாமலைப் பல்கலைக் கழகத்தின் முதன்மைக் கட்டிடத்தின் நேப்பாள மன்னர் அரண்மனையை நினைவூட்டும் மேல் முகப்பும், பெரிய தூண்களும், தன்னைக் கவர்ந்த வடிவமைப்புகளை பழனிவேல் என்ற பொறியாளரின் உதவியோடு வடிவமைப்பு செய்துள்ளார் புலவர் பல்லடம் மாணிக்கம் அவர்கள்..
நூலகத்திற்கான தனி கட்டிடத்தை 2000 ஆம் ஆண்டில் 50 இலட்ச ரூபாய் செலவில் கட்டி முடித்தது மட்டுமல்லாமல் நூலகத்தின் முன்புறம் கண்ணைக் கவரும் விதமான அழகிய பூங்காவையும் கலை நுணுக்கத்தோடு உருவாகி வைத்துள்ளார்.
இவரது முயற்சியைப் பாராட்டி பதிப்புச்செம்மல் மெய்யப்பன், பொள்ளாச்சி மகாலிங்கம், பொற்கோ, க.ப.அறவாணன், முனைவர் சுந்தரமூர்த்தி, கவிஞர் புரட்சிதாசன், த.பழமலை, க்ரியா ராமகிருஷ்ணன், விடியல் சிவா, ஆகியோர் தங்கள் சேகரிப்பிலிருந்து பல நூல்களை கொடையாக அளித்துள்ளனர்.
பல்லடம் மாணிக்கம் அவர்கள்,
நிறங்கள் என்ற கலை இலக்கிய அமைப்பை உருவாக்கி பல நூல்களை வெளியிட்டுள்ளார்.
வள்ளுவம் என்ற இதழை நடத்தியுள்ளார். 24 இதழ்களோடு அது நின்று போனாலும் இலக்கிய இதழ்களில் குறிப்பிடத்தகுந்ததாகும்.
தமிழுக்காகத் தன்னை அர்ப்பணித்துக் கொண்டுள்ள பல்லடம் மாணிக்கம் தமிழைக் காக்க வேண்டுமெனில் தமிழ் நூல்களைக் காக்க வேண்டும், அவைதான் தமிழறிஞர்களுக்குப் பயன்பட வேண்டும், அதன் மூலம் தமிழ் வளர்க்க வேண்டும் என்கிறார்.
பிரபஞ்சன், சிவகாமி, திலகவதி ஆகிய எழுத்தாளர்களுடனான இலக்கியச் சந்திப்பு நிகழ்ச்சி, பெண்கள் இலக்கியச் சந்திப்பு-2007 ஆகிய இலக்கிய சம்மந்தமான நிகழ்வுகளும் இந்த தமிழ்நூல் காப்பகத்தில் தான் நடைபெற்றது.
அனைத்திற்கும் மேலாக ஆசியாவிலேயே பெரிய தனிநபர் நூலகமாக திகழ்வது இந்தத் தமிழ்நூல் காப்பகம் தான்.
