டிக் டிக் நிமிடங்கள்… திட்டமிட்டபடி நிலவில் இறங்குமா சந்திரயான் – 3..?

தற்போது சந்திரயான் – 3 திட்டத்தின் கீழ் அனுப்பப்பட்ட லேண்டா் கலன், நிலவின் தரைப்பரப்புக்கு நெருக்கமாக குறைந்தபட்சம் 25 கி.மீ. தொலைவும், அதிகபட்சம் 134 கி.மீ. தொலைவும் கொண்ட சுற்றுப்பாதைக்குள் பயணித்து வருகிறது. மேலும், சந்திரயான் – 2 திட்டத்தின் கீழ் 4 ஆண்டுகளுக்கு முன்பு அனுப்பப்பட்ட ஆா்பிட்டா் சாதனம் சந்திரயான் -3 லேண்டருடன் தொடர்புகொண்டுள்ளது.

இதனால், ஆர்பிட்டர் இதுவரை எடுத்த புகைப்படங்கள் மற்றும் ஆய்வுகளை அடிப்படையாகக் கொண்டு லேண்டர் கலனை நிலவில் பத்திரமாக தரையிறக்குவதற்கான பணிகளில் இஸ்ரோ தீவிரமடைந்துள்ளது.

இந்நிலையில், இஸ்ரோ வெளியிட்ட செய்தியில்:

“சந்திரயான் திட்டமிட்டபடி செயல்பட்டு வருகின்றது. லேண்டர் அனுப்பிய புகைப்படங்கள் நிலவில் தரையிறங்குவதற்கான இடத்தை தேர்வு செய்ய வசதியாக இருக்கும். நாளை மாலை 5.20 மணிக்கு நிலவில் தரையிறக்குவதற்கான பணிகள் நேரலை செய்யப்படும்” எனத் தெரிவித்துள்ளது. ரஷியா அனுப்பிய லூனா -25 விண்கலம் தோல்வியில் முடிந்த நிலையில், சந்திரயான் -3 லேண்டர் தரையிறக்கம் உலக நாடுகளிடையேயும் பலத்த எதிர்பார்ப்பை ஏற்படுத்தியுள்ளது.