இயக்குநர், நடிகர், தயாரிப்பாளர் என பன்முகதன்மை கொண்டவராக வலம் வந்த மனோபாலா உடல் நலக்குறைவு காரணமாக இன்று காலமானார்.
தமிழில் 700க்கும் மேற்பட்ட படங்களில் நகைச்சுவை மற்றும் குணச்சித்திர வேடங்களில் நடித்துள்ள மனோபாலா உடல் நலக்குறைவால் மரணமடைந்த சம்பவம் திரையுலகில் கடும் சோகத்தை ஏற்படுத்தியுள்ளது.
சமீபத்தில் அவருக்கு லேசான மாரடைப்பு ஏற்பட்டது. தனியார் மருத்துவமனையில் அனுமதிக்கப்பட்டிருந்த அவருக்கு தற்போது ஆஞ்சியோ சிகிச்சை அளிக்கப்பட்டது. பின்னர் குணமடைந்து வீடு திரும்பினார்.
இயக்குநர் பாரதிராஜாவிடம் உதவி இயக்குநராக திரைப்பயணத்தை தொடங்கிய மனோபாலா, 20 படங்களை இயக்கியதோடு, பல படங்களை தயாரித்தும் உள்ளார்.
கடந்த சில நாட்களாகவே கல்லீரல் பிரச்சனை காரணமாக மனோபாலா மருத்துவமனையில் சிகிச்சை பெற்று வந்துள்ளார். கடந்த 15 நாட்களாக வீட்டில் இருந்தபடியே சிகிச்சை பெற்று வந்த மனோபாலா, இன்று சிகிச்சை பலனின்றி காலமானார்.
அவரது மறைவிற்கு ரஜினிகாந்த், இயக்குநர் பாரதிராஜா, பார்த்திபன் உள்ளிட்ட திரையுலகினர் இரங்கல் தெரிவித்து வருகின்றனர்.
Discussion about this post