தமிழீழ விடுதலைப் புலிகள் மீதான தடை..! வைகோ மனு..!  டெல்லி நீதிமன்றம் தீர்ப்பு..!

தமிழீழ விடுதலைப் புலிகள் மீதான தடை..! வைகோ மனு..!  டெல்லி நீதிமன்றம் தீர்ப்பு..!

தமிழீழ விடுதலைப் புலிகள் அமைப்புக்கு இந்தியாவில் தடை நீட்டிக்கப்பட்டுள்ள வழக்கில் தன்னையும் ஒரு தரப்பாக சேர்க்க டெல்லி தீர்ப்பாயத்தில் மதிமுக பொதுச் செயலாளரும் மாநிலங்களவை  உறுப்பினருமான  வைகோ  அளித்த  மனுவை  தீர்ப்பாயம்  ஏற்றுக் கொண்டு விசாரணையை 7ம் தேதிக்கு ஒத்திவைத்தது

இது தொடர்பாக மதிமுக தலைமை கழகம் வெளியிட்டுள்ள அறிக்கையில் தமிழீழ விடுதலைப் புலிகள் அமைப்பை, சட்ட விரோத நடவடிக்கைகள் தடுப்புச் சட்டத்தின் படி, சட்ட விரோத அமைப்பாக அறிவித்து, ஏற்கனவே விதிக்கப்பட்டுள்ள தடையை மே 14ஆம் தேதி அன்று மேலும் ஐந்து ஆண்டுகளுக்கு நீட்டித்து ஒன்றிய அரசின் உள்துறை அமைச்சகம் அரசாணை வெளியிட்டதாக தெரிவிக்கப்பட்டுள்ளது.

அந்த தடை அறிவிப்பின்படி, முகாந்திரங்களை ஆராய்ந்து முடிவு செய்ய, சட்டவிரோத நடவடிக்கைகள் சட்டப்படி, டெல்லி உயர் நீதிமன்ற நீதியரசர் மன்மீத் பிரிட்டம் சிங் அரோரா (Manmeet Pritam Singh Arora) தலைமையில் சட்ட விரோத நடவடிக்கைகள் தடுப்புச் சட்ட தீர்ப்பாயத்தை அமைத்து, கடந்த ஜூன் 5ஆம் தேதி அன்று ஒன்றிய அரசு மீண்டும் அடுத்த அரசாணை வெளியிட்டதாகவும் தெரிவிக்கப்பட்டுள்ளது

அந்ததீர்ப்பாயம், சட்ட விரோத நடவடிக்கைகள் தடுப்புச் சட்டப்படி, விடுதலைப் புலிகள் அமைப்பை தடை செய்யப்பட்ட அமைப்பாக ஏன் அறிவிக்கக்கூடாது, விடுதலைப் புலிகள் அமைப்பைச் சேர்ந்தவர்கள் நேரிலோ அல்லது வழக்கறிஞர் மூலமாகவோ ஜூலை 23ஆம் தேதி மாலை 4 மணிக்கு இந்தீர்ப்பாயத்தில் விளக்கம் அளிக்க வேண்டும் என தெரிவித்திருந்ததாக கூறப்பட்டுள்ளது

அதன்  அடிப்படையில், மறுமலர்ச்சி திராவிட முன்னேற்றக் கழக பொதுச் செயலாளர் வைகோ சார்பில், இந்தத் தீர்ப்பாயத்தில், விடுதலைப்புலிகள் அமைப்புக்கு இந்திய ஒன்றியத்தில் தடை விதிக்க முகாந்திரம் இல்லை என தெரிவித்து  அந்த அமைப்புக்கு விதிக்கப்பட்டிருக்கும் தடையை இந்திய ஒன்றிய அரசு ரத்து செய்ய வேண்டுமென்றும், வழக்கில் தன்னை ஒரு தரப்பினராக சேர்த்துக் கொள்ள வேண்டும் எனவும் டெல்லி தீர்ப்பாயத்தில் மனுத்தாக்கல் செய்யப்பட்டதாகவும் தெரிவிக்கப்பட்டுள்ளது.

மேலும் மதிமுக பொதுச் செயலாளர் வைகோ தாக்கல் செய்த மனுவை தீர்ப்பாயம் ஏற்றுக் கொண்டதாகவும் ஆகஸ்ட் 7ஆம் தேதிக்கு விசாரணை ஓத்தி வைக்கப்பட்டதாகவும் தெரிவிக்கப்பட்டுள்ளது

கடந்த ஒவ்வொரு ஐந்தாண்டுகளிலும் இதே போன்ற மனுவை வைகோ நீதிமன்ற தீர்ப்பாயத்தில் தாக்கல் செய்து இருந்தார் எனவும் மதிமுக தலைமை கழகம் வெளியிட்டுள்ள அறிக்கையில் கூறப்பட்டுள்ளது.

– லோகேஸ்வரி.வெ